Marguerite Robinson schreef 11 november 1995 in Beeld (ZA)

Herman van Veen na SA vir fees op Oudtshoorn



HERMAN VAN VEEN, een van Europa se voorste kabaretsterre, kom aanstaande jaar eksklusief by die Klein Karoo Nasionale Kunstefees op Oudtshoorn optree.

Twee opelugkonserte word op 3 en 4 April aangebied. Weens 'n baie besige program kon geen ander konserte in Suid-Afrika geskeduleer word nie.

Daar is sowat 5000 kaartjies beskikbaar per vertoning en die pryse wissel tussen R45 en R80.

Van Veen, wat al meer as sewentig albums in vier tale agter sy naam het, se konserte is 'n mengsel van liedjies en sketse wat die unieke Van Veen- stempel dra die nar wat die spieël vir die mensdom ophou om enersyds te wys watter komiese en andersyds watter tragiese wesens ons is. Een resensent het hom al beskryf as die Uilspieël van ons tyd.

Van Veen het stemwerk, viool en musiekopvoeding aan die Utrecht- konservatorium gestudeer. Ná hy sy graad gekry het, het hy sy debuut gemaak met Harlekijn en begin om sy eiesoortige musikale teater te vestig waarvoor die Commedia dell'Arte as inspirasie gedien het. Hy is 'n superster in Nederland en Vlaandere en het ook al vir hom naam gemaak in Duitssprekende Europese lande, Amerika, Frankryk, Engeland en Japan.

Verskeie van sy grootste konserte is opgeneem soos dié in die Amsterdamse Koninklijke Carré-teater, die Schauspielhaus in Hamburg, die Concerthaus in Oostenryk, Carnegie Hall in New York, die Ambassador-teater op Broadway en die Olympia in Parys. Benewens sy liedjies, het Van Veen ook al musiek geskryf vir verskeie rolprente en balletproduksies. Hy skryf ook draaiboeke vir TV en is 'n baie gewilde skrywer van kinderboeke.

Van Veen het al verskeie pryse gewen vir sy rolprentwerk, vir etlike albums en vir humanitêre werk. Hy is al vir 25 jaar lank 'n welwillendheidsambassadeur vir Unicef en is die medestigter vir die Columbine-Stigting 'n liefdadigheidsorganisasie wat op 'n klein skaal gesondheids- en omgewingsprojekte in Europa en ontwikkelende lande ondersteun.

In 1993 het 'n groot eer hom te beurt geval toe hy deur die Nederlandse koningsgesin geslaan is tot Ridder in die Orde van Oranje Nassau.

Hoewel Suid-Afrika nooit die geleentheid gekry het om dié uitsonderlike kunstenaar te sien nie weens die kulturele isolasie, het ons wel van sy musiek te hore gekom deur produksies van onder meer Stephan Bouwer en by monde van kunstenaars soos Laurika Rauch en Jannie du Toit. En in die laaste paar jare kon 'n mens darem ook al van sy albums hier te koop kry.

Diegene wat al van sy video's gesien het, weet dié man is in die kabaretgenre waarskynlik van die beste ter wêreld.
Buiten vir die twee konserte gaan Van Veen ook meesterklasse aanbied alles op Oudtshoorn.

Kaartjies vir sy konserte is van vandag beskikbaar by Computicket.





terug naar de index